PIV 2026 · Artikolo 10957
neŭtrala
Derivaĵoj en la artikolo 8
neŭtrala ne partoprenanta, nek volanta partopreni en diskuto, konflikto, milito k.s.: neŭtrala regno neŭtrala lando neŭtrala teritorio lingvo internacia povas esti kaj estos nur ia neŭtrala lingvo Z
neŭtraleco stato de persono, grupo aŭ ŝtato, kiu ne volas partopreni en io, kio bataligas la aliajn: Svislando kaj Aŭstrujo alprenis konstantan neŭtralecon krom plena neŭtraleco en rilato nacia, arta lingvo distingiĝas per Z
neŭtraligi igi iun aŭ ion neŭtrala: neŭtraligi strion de disputata lando neŭtraligi havenon
neŭtraligo
1 ago neŭtraligi: la neŭtraligo de la intergentaj rilatoj estas la tuta celo de niaj laboroj Z
2 LING foresto de kontrasto inter du fonemoj en difinita fonetika ĉirkaŭo.
neŭtralismo
1 doktrino, laŭ kiu regno devas rifuzi aliĝi al ia ajn milita alianco.
2 doktrino, laŭ kiu difinita homgrupo, asocio k.s. ne devas alpreni starpunkton en problemoj sociaj, politikaj k.s.: for la neŭtralismon! ELa
neŭtralisto adepto de neŭtralismo.
neŭtralulo persono aŭ regno neŭtrala: respekti la rajtojn de la neŭtraluloj
seksneŭtrala tia, ke ĝi ne indikas sekson kaj estas uzebla por ajna sekso: seksneŭtrala pronomo HTr
seksneŭtraleco eco de io seksneŭtrala.