★ol

1 por enkonduki la duan parton de neegaleca komparo: pli bona pano sen butero, ol dolĉa kuko sen libero ^Z; pli feliĉa estas donanto ol prenanto ^Z; li ne estas generalo, sed ne malpli valoras ol generalo ^Z; kiu nenion timas estas ne malpli potenca ol tiu, kiu ĉion timas ^Z; la fiero malutilas pli multe ol la malsato k soifo; li parolas pli ol li pripensas. Rim. 1 Oni vidas, ke la komparitaĵo, kiu sekvas ol, havas ĉiam saman formon kiel tiu, kiu ĝin antaŭas (subst., adj., inf. kc). Se temas pri subst-oj k pron-oj, ilia formo dependas de ilia rilato kun la elipsitaj vortoj de la dua parto de la komparo: li vin amas pli ol ĉiujn ^Z (sk. li amas); li vin amas pli ol ĉiuj (sk. amas vin).

2 por enkonduki diferencon inter du ebloj, ecoj ks: mi preferas ĉirkaŭmordi de malsato miajn ostojn, ol per mortigo akiri vivon en riĉeco ^Z; ili eble elektos alian solvon, ol ni elektis ^Z; li havas malsaman karakteron ol lia patro.

3 por signi diferencon de tempo: antaŭ ol vi venos al mi, li diros al mi la veron ^Z; antaŭ ol forveturi, li manĝis; post ol li, enirinte, ekvidis la kapitanon, li kraĉis pro malŝato.

4 por enkonduki frazon kun subjunkcio; oni do povas havi ol ke, ol kiam, ol kiel, ol kiom, ol se ktp, laŭ la senco de la prop.: estas por mi nenio pli bona, ol ke mi forkuru ^Z; pli bone estas, ke la komitato faru tro malmulte, ol ke ĝi facilanime faru ian paŝon ^Z; liaj instrukcioj estas tro konfuzaj, ol ke mi povus ilin ripeti; ŝi estis tute alia, ol kiel li ŝin imagis al si ^Z; ne elspezu monon pli frue, ol kiam vi ĝin posedas; ŝi alnaĝadis multe pli proksime al la tero, ol kiel kuraĝus iu alia ^Z; mi havas pli bonajn okulojn, ol kiel oni pensas ^Z; li estas pli lojala, ol kiel mi kredis; pli granda estas mia puno, ol kiom mi povos elporti ^Z; taksi iun pli alte, ol kiom li meritas ^Z; sia montras pli grandan intimecon, ol kiom montrus la vorto ĝia ^Z; la signaloj estas miloble pli fortaj, ol kiom montras la teorio (aŭ: ol laŭ teorio); pli da nuboj, ol kiom la Nordo scias ^Z; pli bone estas iri seninfana en la ĉielon, ol se ambaŭ, la patro k la filo, iras en la inferon ^Z. Rim. 2 kiom povas esti elipsita post ol, se la kunteksto tion ebligas: ekzistas en ĉiel’ k sur la tero pli da aferoj, ol en la lernejoj instruas filozofoj ^Z.