PIV 2026 · Artikolo 122
adoleski
Derivaĵoj en la artikolo 9
adoleski ntr iu esti en sia adolesko: 15- aŭ 16-jaraĝulo ankoraŭ adoleskas SMG kiam mi adoleskis, mi estis engaĝita en diversaj kampanjoj pri homaj rajtoj Mo!
adoleska rilata al adolesko: Esperanto estis la plej granda malkovro de miaj adoleskaj jaroj Ko
adolesko vivperiodo inter infanaĝo kaj plenkreskeco, karakterizata de la ekfunkciado de la seksaj glandoj: ĉi tio memorigas min denove pri mia adolesko, kiam mi partoprenis kurado-konkurson DCu la aĝo de la roluloj estas sur la sojlo inter infaneco kaj adolesko LCa
adoleskanto junulo en la adoleska vivperiodo: kio okazas kiam homo fariĝas adoleskanto? Oni forlasas la infanajn ludojn FVa Sin. adoleskulo.
adoleskantino junulino en la adoleska vivperiodo: tiu malgranda kaj timida adoleskantino kapablis adresi al la tieaj politikistoj tiel verajn kaj trafajn vortojn Ko Sin. adoleskulino.
adoleskeco, adoleskanteco adolesko: adoleskecon mi travivis en Goiânia FVa ho vi, adoleskanteco flama! OE
adoleskulo adoleskanto: la plej fama revuo por adoleskuloj faris intervjuon pri Esperanto RE! la etoso — por mi, novulo kaj ankoraŭ adoleskulo, ĉio ĉi estis rava Ko
adoleskulino adoleskantino: adoleskulinoj ridante eniras la vagonon MD
antaŭadoleska rilata al aĝo antaŭ la adolesko: kreskanta nombro de antaŭadoleskaj gejunuloj aperigas siajn personajn informojn ĉe interkonaj retejoj LMa