PIV 2026 · Artikolo 15634
1★tial
1 ★ tial pro tiu kaŭzo; pro tiu motivo; pro tio: hodiaŭ estas bela frosta vetero, tial mi prenos miajn glitilojn FE la homoj ne komprenas unu la alian kaj tial ili tenas sin fremde unu kontraŭ la alia Z vi forĵetis ĉiujn miajn konsilojn, Tial ankaŭ mi ridos ĉe via malfeliĉo MT ĉar simila konstruo de lingvo estas tute fremda por la Eŭropaj popoloj , tial mi tute alkonformigis tiun ĉi dismembriĝon de la lingvo al la spirito de la lingvoj Eŭropaj Z
tial, ĉar, tial, ke pro tio, ke: mi petas tion ĉi tial, ĉar mi scias la inklinon de la plimulto da homoj Z mi devas peti la leganton ne preni tro facile neserioze miajn rimedojn de solvo sole nur tial, ĉar ili aperos al li eble kiel tro simplaj Z ĉiuj ŝatis Esperanton nur tial, ke ĝi alproksimigas iliajn korojn Z se «Volapük» akiris certan nombron da adeptoj, tio ĉi estas nur tial, ke la ideo mem de lingvo «tutmonda» estas tiel alta kaj alloga Z
tiala rilata al la dirita kaŭzo: oni devas decidi pri la celoj de la du kunsidserioj, por eviti la duoblan laboron kaj la tialan perdon de tempo