PIV 2020 · 3849
encefal/o
encefal/o ❤ (encephalon) La tuto de la organoj, kiujn enfermas la kranio de la vertebruloj; cerbo: la encefalo konsistas el 5 embriogenezaj partoj diverse evoluintaj laŭ la klasoj: la telencefalo, tre evoluinta ĉe la mamuloj k precipe ĉe la homo (cerebraj hemisferoj), la diencefalo (talamo, pineala korpo, hipofizo, optika nervo k retino), la mezencefalo (kolikloj, cerebraj pedunkloj), la metencefalo (cerebelo) k la mjelencefalo (mjela bulbo).
encefala. Rilata al la encefalo.
encefalino ⚥ Nerva peranto de la centra nervosistemo, havanta antidolorigajn ecojn.
encefalito. Inflamo de la encefalo: akuta encefalito.
letargia encefalito. Epidemia infekta malsano, trafanta precipe la mezencefalon, sed ankaŭ mjelon k periferiajn nervojn; ĝin karakterizas febro, dormemo k diversaj paralizoj; kaŭzata de viruso.
encefalalgio. Intensa kapdoloro, observata en la cerba sifiliso.
encefalografio. ⚕ Registrado k studo de la osciloj de elektra potencialo, kiuj konstante estiĝas en la cerba kortiko; tiujn oscilojn modifas sensaj ekscitoj, mensa aktiveco, epilepsio ktp.
encefalogramo. Kurbo ricevita per encefalografio.
encefalopatio. Kn de la encefalaj malsanoj.
polioencefalito ⚕ Epidemia malsano simila al poliomjelito, sed trafanta la encefalon.
rombencefalo ❤ (rhombencephalon) Tuto de la oblonga mjelo, de la ponto k de la cerebelo: la kvara ventriklo, dilatiĝo de la centra kanalo, kiu ilin komune trairas, havas romban formon.