PIV 2026 · Artikolo 996
★apogi
Derivaĵoj en la artikolo 10
★ apogi tr
1 subteni kaj firmigi ion per alia objekto submetita: apogi la kapon sur la mano Z apogi la kubutojn sur balustrado sin apogi sur ies brakoj ŝi serĉis ion, sur kio ŝi povus sin apogi Z ŝi sidis kun tempio apogita sur la mano Z sur la kusenoj de seĝo, kaj apogite, sidis Z plafono apogita sur tridek kvin kolonoj B (figurasence) biblioteko, kiu apogas sin sur abonoj
2 oblikve meti ion kontraŭ firme staranta objekto, kiu malhelpu ĝin fali: apogi ŝtupetaron al muro apogi lancon al kolono apogu al ni vian kapeton Z li apogas sin kontraŭ la unua per la manoj al lia ventro kaj elpuŝigas sin kune kun li Z li staris rekte kaj en unu mano tenis glavon, dum la dua mano estis apogata al la Dana blazono Z
3 (figurasence) uzi ion kiel pravigon aŭ motivigon por plua agado aŭ teoriado: apogi siajn postulojn sur la kutimo apogante sin sur la tiel ricevitaj sciigoj ĉiu klubo kunmetas nomaron LEsp sin apogi sur la rezono kaj ne sur siaj sentoj
4 (figurasence) plifortigi iun aŭ ion per sia aŭtoritato: apogi kandidaton apogi proponon
apoga
1 apoganta: MATE (figurasence) apoga funkcio apoga hiperebeno
2 servanta por apogi iun: apoga seĝo Z
apogo
1 ago de iu aŭ io apoganta: por ke la volvaĵo de la pizo akiru punkton de apogo Z jen vi fidas la apogon de Egiptujo, tiu kano rompita MT al via talento mankas la apogo de lernado Z la urbestraro donis al ni sian moralan apogon Z
2 io, kio apogas: unu kapo facile trovas apogon Z Amalio perdis siajn apogojn Z unu el la plej gravaj apogoj de la Komitato, la lingvisto Baudouin de Courtenay Z pli aŭ malpli frue la laboristaro estos la plej forta apogo de nia afero Z
(figurasence) senreligieco, kiu donas al la homo nenian pozitivan apogon, daŭras ordinare ne longe Z por vendisto mensogo estas necesa apogo Z facile trovi apogon ĉe iu
apogiĝi apogi sin: gastinoj, apogiĝinte unu al alia Z mi apogiĝas al li kaj restas tie, trista SŠt mi scias, ke amo, vera amo, apogiĝas sur la akcepto de l’ personeco de la alia HGa
apogilo io, kio servas por apogi ion, aŭ al iu por sin apogi: se li la batito leviĝos kaj irados ekstere per apogilo, tiam la batinto estu senkulpa MT apogilo de kaduka tegmento apogilo de seĝo apogilo de benko
brakapogilo ĉe benko, brakseĝo k.s. parto, sur kiu la uzanto povas ripozigi sian brakon.
dorsoapogilo ĉe seĝo k.s. parto, sur kiu la uzanto apogas sian dorson.
kontraŭapogilo TEKN helpilo, ordinare stango klinita, kiu subtenas kaj firmigas vertikalan foston.
kubutapogi apogi ion per la kubutoj: kubutapogante sin sur ambaŭ genuoj HLu
libroapogilo peza bloko, kutime kun ornamoj, skulptaĵoj k.s., kiu tenas librojn starantaj sur breto, tablo k.s.; aŭ simpla L-forma peco de malpeza materialo, kies horizontala parto kuŝas sub kelkaj el la libroj.
subapogi apogi de sube: T-pecoj subapogas la balkonon