PIV 2026 · Artikolo 1240

asimili

Litero A

Derivaĵoj en la artikolo 6
  1. asimilo
  2. asimilad/o
  3. asimilebl/a
  4. asimiliĝ/i
  5. interasimiliĝ/i
  6. malasimili
asimili tr
1 BIOL vivulo transformi al sia substanco alian sorbitan substancon: nutraĵoj estas unue digestataj, poste asimilataj
2 MEDI parte aŭ tute malaperigi per asimilo al la organismo ion gasan, likvan aŭ solidan, kiu normale ne devus troviĝi en ĝi. ➞ digesti, sorbi.
3 GEOL magmo fandi kaj proprigi al si ĉirkaŭan rokaĵon.
4 alproprigi al sia menso ideojn aŭ sciojn: ili tute ne kapablis asimili matematikon mi parkeris la regulojn, sed ilin ja ne asimilis
5 anigi al si fremdajn homgrupojn: la romanoj sukcesis asimili multajn venkitajn gentojn ➞ aneksi.
6 LING anstataŭigi parolsonon per alia sono, kiu pli similas al la apuda sono: iuj parolantoj asimilas n al m antaŭ b
asimilo, asimilado ago de iu, kiu asimilas: la asimilado de la grasoj asimilado de novaj scioj GEOL asimilado estigas lokajn modifojn en la ĥemia konsisto de magmo
asimilebla tia, ke ĝi povas esti asimilita: BIOL facile asimilebla nutraĵo MEDI asimileblaj materialoj enplantitaj en la organismon por refasoni difektitajn organojn, uzataj i.a. en la makzelo-facia ortopedio kaj ĥirurgio
asimiliĝi fariĝi asimilita: malgraŭ ĉiuj penoj asimiliĝi kun la ĉirkaŭantaj popoloj, la hebreoj ĉiam prezentas tute apartan popolon Z
interasimiliĝi asimiliĝi unu kun alia: ju pli la homoj komunikiĝados sur neŭtrale-lingva fundamento, des pli rapide ili ankaŭ en rilato religia interasimiliĝos Z
malasimili
1 BIOL elimini el sia korpo proprajn substancojn.
2 LING modifi aŭ malaperigi parolsonon, kiu tro similas alian apudan sonon.