PIV Reta Vortaro

PIV 2020 · 13781

sam/a

1 Estanta nedistingebla de iu aŭ io alia, pro tio, ke ĝi estas tiu ĉi alia mem; mema, identa: tio ĉi estis tiu sama feino, kiu prenis sur sin la formon de princino ; ĉiuj iliaj verkoj, vortoj k agoj ĉiam spiras tute klare tiun saman ideon ; ili senkonscie revas pri tio sama, pri kio ni revas ; ili staras nun sur tiu sama punkto, sur kiu ili staris antaŭ 14 jaroj ; li, kiu en ĉi tiu sama domo estis malsatinta ; el sama tero devenas, saman sukon entenas ; sama gento, sama sento ; la uzado de la artikolo en E. estas tia sama kiel en la aliaj lingvoj .

2 Havanta ĉiujn ecojn similajn al tiuj de io alia: ni ne uzas saman lingvon; la filo tute similas la patron: sama nazo, samaj okuloj ; via libro estas la sama, kiel la mia. egala 1.

same. En la sama maniero: tiel same ni ankaŭ diras […] ; tiuj nervoj reagas tute same.

samo. Io sama: mi ĉiam diras la samon, ĉar estas ĉiam same; la samo okazis al li, kiel al lia frato .

sameco. Stato, eco, per kiu du aŭ pluraj aferoj estas samaj: ilia sameco estas tiel granda, ke eĉ la patrino ne povas ilin distingi.

malsama. Diferenca, tute alia, havanta kontraŭajn ecojn: tie (en la sorĉita infano) estis du tute malsamaj naturoj, kiuj alternadis ; paroloj k faroj estas malsamaj aferoj ; kompreniĝado inter anoj de la plej malsamaj popoloj .

malsameco. Eco, per kiu io estas malsama: oni neniam vidis tian malsamecon inter du fratoj.

tutsama. Sen ia ajn diferenco.