★egal/a

1 Tute simila, neniel diferencigebla de alia: nomo egala, sed esenco mala ^Z; la senco de tiu prepozicio estas ĉiam egala ^Z; en senviva nokto egala sorto ĉiujn unuigos ^Z; egalaj okazoj; ili sentos, ke ili ĉiuj havas egalan koron, egalajn mensojn, egalajn idealojn, egalajn suferojn k dolorojn ^Z; ĉiu litero estas parolata ĉiam egale ^Z; Vi, kiun ĉiuj malsame prezentas, sed ĉiuj egale en koro Vin sentas ^Z; morto ĉiujn egale atingas ^Z. Sin. identa. Rim. Kvankam tiu signifo estas la sola donita en U.V., k ofte trovebla ĉe Z, la sekvintaj verkistoj esprimadas ĝin per sam, kio ebligas konfuzon kun la propra senco de tiu ĉi rad..

2 Havanta unu econ (grandon, dimension, kvanton ks) ne diferencigeblan de la eco de komparataĵo: du kvantoj, se egalaj al tria, estas ankaŭ egalaj inter si; kolektu al vi militistaron egalan al tiu, kiu falis, k ĉevalojn nombregale al tiuj ĉevaloj ^X; nenio, kion oni povas deziri, povas esti egala al ^X (saĝo); ni havas egalan rajton uzi la «ĉi» antaŭ aŭ post la pronomo ^Z; mi faris al vi grandan nomon, egalan al la nomoj de la potenculoj ^X; ne ĉiuj havas egalan feliĉon ^Z; li havas neniun egalan al si ^Z; batali kun egalaj armiloj, ŝancoj; ĉiuj de egala longo? ^Z; al ĉiuj egale apartenanta lingvo ^Z; iri egale kun iu ^Z (egalpaŝe); via propono estas egale bona.

3 Prezentanta partojn ne diferencajn unu de la aliaj: promeni per egala paŝado ^B; kanti per egala voĉo ^B; egala humoro, pulso; montri animon egalan en la malsukcesoj; li ĉiam restas egala al si mem. ☞ konstanta, senŝanĝa, unuforma.

4 Prezentanta tian similecon kun alia, ke oni ne havas motivon preferi unu al alia: ĉu sidi, ĉu promeni, tio estas egala por mi; en tiaj okazoj ni uzus la finiĝon «n» tute egale, ĉu ia prepozicio starus aŭ ne ^Z; egale, ĉu vi estas riĉa aŭ senhava ^Z. ☞ indiferenta.