PIV 2026 · Artikolo 16435
★varti
Derivaĵoj en la artikolo 7
★ varti tr gardi kaj prizorgi estulon, kiu bezonas helpon pro sia juneco aŭ nefortikeco: varti bebon varti hundeton la malsana knabo priverŝadis ĝin sian floron kaj vartadis ĝin Z mi vartadis ŝin, kiam ŝi estis ankoraŭ tre malgranda infano Z ĝardenoj unu apud la alia, ĉiu aranĝita kaj vartata Z bone vartata hejmo de idiotoj Z ➞ flegi.
2 TEKN konstante prizorgi ekipaĵon k.s., tenante ĝin en bona stato, ekz. per regulaj kontroloj kaj riparoj: varti aŭtomobilon ➞ revizii 4.
varto, vartado
1 zorga gardado de malforta estulo: por la vartado de beboj neniu povas anstataŭi iliajn patrinojn (figurasence) per tro multa varto malboniĝas la farto Z
2 tenado de ekipaĵo k.s. en bona stato: vartado de programaro vartado de konstruaĵo ➞ vartokontrakto.
vartejo loko, en kiu oni vartadas tre junajn infanojn, kiuj ankoraŭ ne vizitas lernejon.
vartisto, vartistino iu, kiu profesie vartas: vi forkuris de via vartistino, ĉar ŝi minacis al vi per la vergo Z (figurasence) laboro, la konsolanto de suferantoj , la vartisto de tiuj, kiujn ĵetas tien kaj reen la ventegoj de la vivo Z
infanvartejo = (prefere) vartejo.
kunvartito iu, kiu estis vartata de la sama virino kiel la priparolato: kunvartito de la tetrarĥo Herodo NT