PIV 2026 · Artikolo 12088
★persiko
★ persiko BOTA frukto de persikarbo: drupo globa, unusulka, kun haŭto de flava ĝis ruĝa, lanuga aŭ glata kaj kun karno tre sukplena, bongusta, blanka aŭ flaveta, enhavanta malmolan unuseman kernon kun sinuaj sulkoj, adheran aŭ ne al la karno.
persikarbo, persikujo speco de prunuso, kun dentaj glataj folioj lancetformaj aŭ elipsaj, kaj kun rozaj floroj; ĝiaj fruktoj estas persikoj; origine el Ĉinujo, enkondukita en Eŭropon fare de la romanoj, hodiaŭ vaste kultivata por fruktoj manĝataj krudaj, kuiritaj aŭ sekigitaj; multaj kultivoformoj. specio Prunus persica ➞ brunjono, nektarino.