PIV 2026 · Artikolo 12112

petalo

Litero P

Derivaĵoj en la artikolo 11
  1. petala
  2. petalar/o
  3. petalec/a
  4. kun/iĝpetala
  5. kun/iĝpetalul/o
  6. liberpetala
  7. liberpetalul/o
  8. multpetala
  9. senpetala
  10. senpetalul/o
  11. unupetala
petalo BOTA ĉiu el la internaj ĉirkaŭaj folioj de floro, ĝenerale maldikaj, delikataj, blankaj aŭ okulfrape koloraj; la interna parto de perianto: petalo ĝenerale konsistas el limbo kaj ungolo Sin. korolfolio. ➞ sepalo, tepalo, petalaranĝo, petalaranĝiĝo.
petala rilata al petaloj.
petalaro korolo.
petaleca sepalo, brakteo, nektarujo k.a. aspektanta kiel petalo pro koloro aŭ formo.
kuniĝpetala korolo aŭ floro havanta parte aŭ tute kuniĝintajn petalojn.
kuniĝpetalulo membro de nenatura grupo de florplantoj karakterizataj de kuniĝintaj petaloj. Sin. gamopetalo.
liberpetala korolo aŭ floro havanta tute liberajn petalojn.
liberpetalulo membro de nenatura grupo de florplantoj karakterizataj de liberaj petaloj. Sin. dialipetalo.
multpetala floro havanta korolon el multaj apartigeblaj petaloj.
senpetala ne havanta petalojn.
senpetalulo membro de nenatura grupo de florplantoj karakterizataj de la malesto de petaloj. Sin. apetalo.
unupetala havanta nur unu petalon, aŭ havanta korolon el nur unu peco aŭ el pluraj petaloj koherantaj en tuba aŭ bovla formo.