PIV 2026 · Artikolo 14414

★skrapi

Litero S★ Fundamenta

Derivaĵoj en la artikolo 15
  1. skrapad/o
  2. skrapaĵ/o
  3. skrapet/i
  4. skrapil/o
  5. ĉielskrapant/o
  6. deskrapi
  7. forskrapi
  8. dent/oskrapul/o
  9. groŝ/oskrapa
  10. kamenskrapist/o
  11. kotskrapil/o
  12. nuboskrapul/o
  13. priskrapi
  14. ŝuskrapil/o
  15. terskrapil/o
★ skrapi tr
1 forigi partetojn el la supraĵo de objekto per iom tranĉa ilo, kies eĝon oni pasigas orte sur la objekto: skrapi siajn ŝuojn forigante la koton skrapi ŝipkarenon forigante la moluskojn k.s. skrapi muron por forigi la antaŭan farbon k.s. skrapi kamenon forigante la fulgon li prenis potpecon, por skrapadi sin per ĝi MT skrapi legomojn forigante la ŝelon (figurasence) skrapu la civiliziton kaj vi trovos la kavernan homon ➞ grati, raspi, raboti, rugini.
2 eligi malagrablan sonon per skrapado aŭ simila ago: ĝi simple skrapas la orelojn Z skrapi violonon branĉoj skrapis sur la fenestron de la aŭto skrapi la plankon per la piedoj por protesti kontraŭ parolanto
skrapado
1 ago skrapi: skrapado de la kota planko ➞ skrapfranĝo.
2 MEDI operacio (per la fingroj aŭ per skrapilo), per kiu oni purigas kavon (ekz. uteron, artikon aŭ absceson), forigante la malsanecajn produktojn eventuale entenatajn. ➞ kuretado.
skrapaĵo forĵetinda parto produktita de skrapado.
skrapeti ne profunde aŭ malforte skrapi.
skrapilo
1 ilo konsistanta el tenilo kun orte fiksita klingo aŭ lameno, uzata por skrapi: forna skrapilo Z ➞ skrapmaŝino.
2 PRAH ŝtona ilo prilaborita el splito 2 per seninterrompaj retuŝoj laŭ unu rando.
ĉielskrapanto tre alta konstruaĵo.
deskrapi, forskrapi forigi ion skrapante: la kalkaĵon, kiun oni deskrapis, oni ĵetu ekster la urbon MT
dentoskrapulo = (prefere) ronĝulo.
groŝoskrapa tre avara.
kamenskrapisto homo, kies metio estas skrapadi kamentubojn.
kotskrapilo ŝuskrapilo.
nuboskrapulo= (prefere) ĉielskrapanto.
priskrapi purigi per skrapado: la domon oni priskrapu interne MT
ŝuskrapilo metala klingo fiksita ĉe la malsupro de muro, apud pordo, por ke oni tie skrapu siajn ŝuojn.
terskrapilo skrapmaŝino.