PIV 2026 · Artikolo 16507

★vera

Litero V★ Fundamenta

Derivaĵoj en la artikolo 18
  1. vere
  2. veri
  3. vero
  4. veraĵ/o
  5. verec/o
  6. verem/a
  7. verig/i
  8. veriĝ/i
  9. verism/o
  10. verul/o
  11. ververa
  12. ververe
  13. envere
  14. kontraŭveraĵ/o
  15. malvera
  16. malvero
  17. malveraĵ/o
  18. viv/overa
★ vera
1 konforma al tio, kio efektive estas; konforma al la ekzistantaj faktoj aŭ al la realaĵo: ne ĉiu raporto estas vera vorto Z vidu, tio estis vera historio Z ha, se tio estus vera! vera kiel vorto de profeto Z
2 ne ŝajna; ne falsita; ne imitita; aŭtentika: vera opinio montriĝas en ebrio Z mi transiras al la vera temo de mia hodiaŭa parolado Z pli saĝa,
Ol sep veraj saĝuloj MT
la soldato ne povis sin deteni kaj kisis ŝin, ĉar li estis vera soldato Z tiu estas la vera Dio NT vera amiko li estas vera hidrargo tre moviĝema Z vera diamanto ASTR vera alto de astro MARN vera direkto, kapuso kontraste kun la ŝajnaj ➞ vera tagmezo, vera horo.
vere
1 en vera maniero; konforme al la vero: se mi demandos, ĉu vi respondos vere? vere mi diras al vi: vi ne trairos la urbojn de Izrael, antaŭ ol venos la Filo de homo NT
2 efektive; konforme al la realaĵo: kion ni vere bezonas, Dio ĝin donas Z estis tia vento, ke oni vere devis sin kontraŭstreĉi al ĝi Z vere, la Eternulo estas en ĉi tiu loko, kaj mi ne sciis MT mi kredas, ke li estas vere malsana ŝi estis vere tre bela ĉu vere? ➞ envere.
3 konfesinde (kun konceda nuanco): vere la vojon baras diversaj malhelpaĵoj, sed niaj progresoj estas certaj en la nuna minuto Esperanto, vere, aperas kiel sola kandidato por lingvo internacia Z
veri ntr esti vera: tio nepre ne veras, eĉ ne povas esti vera ADG foje la stereotipoj pli veras ol kiom oni supozas CSa
vero io vera: mi diras al vi nenion alian krom plej pura vero Z diri al iu nudan veron Z malsaĝulo kaj infano parolas la veron Z kun vero severa komercaĵo forvelkos Z amiko estas kara, sed vero pli kara Z la tempo ĉiam malkaŝas la veron Z la vero ĉiam venkas FE Pilato diris al li: Kio estas la vero? NT se diri la veron, mi estas ne tute senkulpa «estas vero, ke nun estas malfrue en la nokto», «mi tamen tre forte dezirus vidi la reĝidinon» Z
veraĵo konkreta esprimo de io vera: la fundamentaj veraĵoj de la religio, de la scienco sed tio ankaŭ estis la sola veraĵo, kiu en la daŭro de ŝia vivo eliris el ŝiaj lipoj Z
vereco eco de io, kio estas vera aŭ konata kiel vera: la vereco de tio ne estis definitive pruvita OE la konscio de la vereco de nia ideo Z li kun ĉiu jaro pli lernis kaj pruvis la verecon de sia malnova kredo Z tiuj ruĝbarbuloj kredis tre malmulte pri vereco de la dirita famo Z
verema inklina diri ĉiam la veron. ➞ verama.
verigi
1 igi ion vera: li meritus, ke ŝi verigu tion, kion li diris Z
2 konfirmi 1: pluraj dokumentoj verigas tion Ko ➞ pravigi.
veriĝi iĝi vera: lia profetaĵo ne veriĝis
verismo BELA BELE itala naturalisma skolo.
verulo FILO RELI KRIS homo, kiu vivas konforme al la vero kaj la plej noblaj virtoj: tiele diras la sanktulo, la verulo, kiu havas la ŝlosilon de David NT verulo ne havas falson en sia menso kaj ĉiu lia ago montriĝas vera ChT
ververa absolute vera; aŭtenta: fine mi ekhavos ververan fraton, naskiton de mia propra patrino VVi
ververe tute vere; efektive: ververe mi mem pruntis la monon FSz ververe, lingvo gravas por la tuta ekonomio RE
envere efektive; ja; vere 2: la malnova grandĉambro estis tiel ornamita , ke neniu rimarkis, kiel kaduka kaj malnova ĝi envere estas SEn la homoj envere rapide maljuniĝas LiZ envere tiaj proponoj estas malfacile realigeblaj DBl kial vi studas sociologion? Kaj kio ĝi estas envere? OE
kontraŭveraĵo io, kio estas kontraŭa al la vero: por savi vin de la vojo de malbono, de homo, parolanta kontraŭveraĵon MT ➞ mensogo, preteksto.
malvera
1 mensoga: ne parolu kontraŭ via proksimulo malveran ateston MT vorton malveran virtulo malamas MT malvera kiel epitafo
(analoge) malvera pesilo MT malveraj atestantoj NT
2 ne efektiva; nur ŝajna: ŝi elmontris sian tutan malveran aristokratecon Z malvirtulo akiras profiton malveran MT ➞ falsa.
malvero, malveraĵo mensogaĵo: viaj profetoj profetis al vi malveraĵon MT
vivovera tiel vera kiel la vivo mem: vivovera pentraĵo vivovera priskribo ➞ verdira, verŝajna.