PIV 2026 · Artikolo 4072

★esenco

Litero E★ Fundamenta

Derivaĵoj en la artikolo 12
  1. esenca
  2. anizesenco
  3. bergamot/a esenco
  4. gerani/a esenco
  5. kadesenco
  6. kajeput/a esenco
  7. lavend/a esenco
  8. roz/a esenco
  9. santalesenco
  10. senesenca
  11. terebintin/a esenco
  12. vivesenca
★ esenco
1 ĉio, kio faras ion aŭ iun tio, kio ĝi estas; ĉio, kio konsistigas la propran naturon de io aŭ iu, kontraste kun la ŝajno aŭ la eksteraĵo: mediti pri sia propra interna esenco Z homo estas laŭ sia esenco ia sociema estaĵo la esenco de la vivo nomo egala, sed esenco mala Z
2 la kerno; la plej ĉefa parto; la nepra nemalhavebla ecaro de io: mi ne tute klare komprenis la esencon de via demando Z eĉ se ni tute ne scius la esencon de la akcento Z la tuta esenco de lingvo estas bazita antaŭ ĉio sur interkonsento Z la esenco kaj celo de niaj kongresoj Z bruo potenca, nula esenco Z al homo, kiu ne konas la esencon de muziko, ŝajnas, ke nenio estas pli facila, ol ludi fortepianon Z la diferenco de la lingvoj prezentas la esencon de la diferenco de la nacioj Z ataki la esencon de la demando ➞ principo.
3 FARM koncentrigita eltiraĵo el iuj substancoj ĝenerale bonodoraj aŭ aromaj: naturaj esencoj artefaritaj esencoj vegetaĵaj esencoj estas ordinare ekstraktataj per distilado roza esenco citrona esenco gerania esenco lavenda esenco ➞ oleo, terpeno.
4 BOTA aroma kaj vaporiĝema oleeca produktaĵo de iuj plantoj.
5 FILO la esto en si mem; la realaĵo kuŝanta sub la fenomenoj: la dia esenco por Sartro la ekzistado antaŭas la esencon ➞ noumeno.
esenca
1 konsistiganta la propran naturon de io: esencaj karakteroj de ia speco esencaj elementoj de ŝtono laŭ la aspekto li estis eĉ tute bonorda homo, sed esence li estis ruzulo Z
2 prezentanta la esencon de io: via regularo ŝajnas al mi ne sufiĉe klara kaj esenca Z
3 nepre plej grava: heredigi al miaj amantoj esencan bonon MT la esenca devo de homo estas vivi laŭ la racio problemoj ne esencaj Z estas esence agi kun rapideco ➞ fundamenta, kerna, precipa.
4 BOTA rilata al esenco 4 aŭ ĝia produktado: esencaj ĉeloj esencaj kanaloj esencaj glandoj
anizesenco FARM esenco distilita el anizo por medicino kaj por aromigi likvorojn kaj bombonojn.
bergamota esenco FARM bonodora esenco de la ŝelo de bergamoto, enhavanta i.a. linalolan acetaton, uzata i.a. por fabrikado de likvoro, bombonoj kaj parfumo.
gerania esenco FARM rozodora esenco ekstraktata el rozgeranio kaj parencaj specioj, enhavanta esterojn de i.a. geraniolo kaj citronelolo. ➞ geranialo.
kadesenco FARM esenco distilata el la ligno de kado, uzata kontraŭ dermatozoj kaj i.a. en iuj sapoj kaj ŝampuoj.
kajeputa esenco FARM esenco el kajeputo 1, uzata kontraŭ sepsaĵo, kontraŭ moskitoj, kaj kiel parfumo.
lavenda esenco FARM esenco el floroj de vera lavendo aŭ intera lavendo, uzata en la parfuma kaj medicina industrioj; enhavas linalolon, pinenon, limonenon, geraniolon kaj plurajn esterojn.
roza esenco FARM esenco ekstraktata el la petaloj de odoraj rozoj (centfolia rozo, damaska rozo kaj moska rozo), riĉa je geraniolo.
santalesenco FARM esenco ekstraktata el la kernoligno de santaloj.
senesenca ne havanta realaĵon aŭ pozitivan enhavon.
terebintina esenco FARM esenco ricevata el la distilado de terebintinoj kaj uzata por solvi grasojn, fabriki vernisojn ktp.
vivesenca plej grava por ies vivo aŭ por la vivo ĝenerale: detrui vivesencan parton de la naturo vivesence gravaj ekzamenoj SMG