★instig/i

★instig/i (tr) Per ekscitoj k admonoj puŝi iun al ago: la oficiro instigis la soldatojn al rapida marŝo ^B; instigi ĉevalon per vipo; instigi iun al batalo, ribelo, kontraŭstaro, pacienco; mi volas instigi vin bone prepariĝi por la venontaj diskutoj ^Z; kia demono vin instigas, ke vi puŝiĝu tien, kien oni ne devas? ^Z; farado de malbono al kio instigadis lia edzino ^X; (f) motivoj, instigantaj min peti permeson ^Z; al tiu esploro min instigis scivolemo; nur interesaj libroj instigas legadi k aĉeti; tiu homfratiga ideo flame instigadis min labori ^Z. ☞ agiti, impulsi, iniciati, inklinigi, inspiri, inviti, puŝi, stimuli. Rim. Z. uzis iufoje tiun verbon kun senco tre proksima al tiu de eksciti (ĉio instigis la imagon) aŭ inciti (tiuj mallumaj demonoj konstante instigas homon kontraŭ homo).