PIV 2026 · Artikolo 868
★anstataŭ
Derivaĵoj en la artikolo 8
★ anstataŭ prepozicio en la loko, rolo aŭ funkcio de: neniu povas protesti, se vi skribos per «h» anstataŭ supersignoj Z anstataŭ krispaj haroj estos kalvo, kaj anstataŭ eleganta mantelo estos sako MT anstataŭ kupro mi alportos oron MT li faris ŝin reĝino anstataŭ Vaŝti MT ne servas larmo anstataŭ armo Z anstataŭ respondi aparte al ĉiu persono mi esprimas mian plej profundan dankon al ĉiuj kune Z anstataŭ iri al ofico, li promenadas sur la bulvardoj, ludas kartojn Z anstataŭ ke ĉiu lernas diversajn lingvojn, ĉiuj ellernadu unu saman lingvon Z anstataŭ ke ili dankus la helpon, ili eĉ persekutas tiun, kies sana vido volas plibonigi iliajn vivojn SSz
(kun subkomprenata infinitivo) Petro batis Paŭlon anstataŭ bati Vilhelmon Z ĉiun, kiu petos ion de ia dio aŭ homo anstataŭ peti de vi oni ĵetu en kavon de leonoj MT
➞ vice al. anstataŭa tia, ke ĝi anstataŭas, aŭ povas anstataŭi: anstataŭa rado anstataŭa ŝlosilo ➞ vica 3.
anstataŭi tr esti en la loko de iu aŭ io; plenumi la rolon aŭ taskon de iu aŭ io: morgaŭ mi devos anstataŭi profesoron Quindel dum lia franca kurso RSc ne tiel baldaŭ ankoraŭ troviĝos persono, kiu volus kaj povus min anstataŭi en la diversaj multaj laboroj por nia afero Z seriozeco anstataŭis ĉe ŝi la momentan gajecon Z nenio en la mondo iam povos anstataŭi lian amon HLu
1 Ne uzu anstataŭi en la senco de anstataŭigi.
anstataŭo io aŭ iu anstataŭanta: la malvirtulo estos liberiga anstataŭo por la virtulo MT
anstataŭaĵo io, kio anstataŭas: la fortikaĵoj kaj turoj fariĝos por ĉiam anstataŭaĵo de kavernoj MT uzata de vegetaranoj kiel anstataŭaĵo de viando LVV
anstataŭanto
1 iu, kiu anstataŭas: vi estos la unua, kiu ekvidos la kapon de via anstataŭanto HVa
2 (figurasence) anstataŭaĵo:signoj aŭ anstataŭantoj (simboloj) de la fenomenoj ILa
anstataŭigi meti en la lokon de iu aŭ io; doni la rolon aŭ taskon de iu aŭ io: anstataŭigi dornobarilon per muro anstataŭigi oficiston per oficistino sikomoroj estas dishakitaj, sed ni anstataŭigos ilin per cedroj MT mi akceptis la formojn, elĵetis ilin, provis anstataŭigi ilin per aliaj Z ➞ substitui.
2 Ne uzu anstataŭigi en la senco de anstataŭi.
anstataŭiĝi esti anstataŭigata: deklinacioj plene anstataŭiĝas per la prepozicioj Z
anstataŭilo surogato.