PIV 2026 · Artikolo 13450

★ribeli

Litero R★ Fundamenta

Derivaĵoj en la artikolo 7
  1. ribela
  2. ribelo
  3. ribelant/o
  4. ribelem/a
  5. ribelig/i
  6. ribelul/o
  7. popolribelo
★ ribeli ntr rifuzi obei la registaron aŭ aŭtoritatan instancon, penante ilin perforte forigi: sed nur la popolaĉo ribelas B nur ne ribelu kontraŭ la Eternulo MT ekribelis regimento de masonistoj kaj ŝtonistoj B
(figurasence) ĉu por tio mi ribelis kontraŭ ĉiuj instinktoj de la homeco ? Z lia spirito ribelis kontraŭ la tiutempe reganta doktrino
➞ separi 2.
ribela rilata al ribelo: ribelaj minacoj ribelaj komplotoj por ke ĉiu Esperantisto sciu tute klare, kio estas lojala kaj kio estas ribela al la Fundamento Z
ribelo agoj de tiuj, kiuj ribelas: tiam eksplodos ĝenerala ribelo Z ribelo de la ŝipanaro sufoki ribelon (figurasence) en ŝia tremanta voĉo sonis obtuza kaj retenata ribelo de virina fiereco Z ➞ revolucio, rezistado.
ribelanto homo, kiu ribelas: la ribelantoj levis la ruĝan flagon
ribelema inklina al ribelo; malobeema: tiu urbo estas urbo ribelema kaj malutila por la reĝoj kaj landoj MT eĉ en Germanio, kie homoj tradicie ne estas tiom ribelemaj, pli kaj pli ofte okazas manifestacioj kontraŭ senlaboreco SMa ➞ malmolnuka.
ribeligi instigi al ribelo: ankaŭ tiun ĉi ili jam ribeligis kontraŭ mi! Z morgaŭ povas aperi aliaj ribeligantoj Z ➞ provoki.
ribelulo ribelanto: aŭskultu, ho ribeluloj, ĉu el ĉi tiu roko ni elirigu por vi akvon? MT
popolribelo insurekcio: eble okazos popolribelo, eble batalado en la stratoj ALö ĉiufoje kiam la prezo de benzino altiĝas, perfortaj popolribeloj okazas en Lagos, la ekonomia ĉefurbo MD