PIV 2026 · Artikolo 14787
★sterko
Derivaĵoj en la artikolo 5
★ sterko
1 brutaj ekskrementoj, miksitaj kun la pajlo, sur kiu la brutoj kuŝis, kaj uzataj post iom da fermentado por plibonigi kulturgrundon: la varma sterko en la stalo Z korto, sur kiu kuŝis amaso da sterko Z sterko de bovinoj sterko de kolomboj MT kiam la akvoj de Nilo malaperas, restas fruktoporta ŝlimo, kiu anstataŭas plej bonajn sterkojn B ➞ kompoŝto, sterkakvo.
2 = (prefere) sterkaĵo.
3 (figurasence) malnobla aŭ malŝatinda afero: kiuj estis edukitaj sur purpuro, tiuj ruliĝas nun sur sterko MT la kadavro de Izebel estos kiel sterko sur la tero MT ➞ cindro, guano, rubo.
sterki tr plibonigi ion aldonante al la grundo plantonutrajn substancojn: sterki ĝardenon sterki kampon (analoge) la venenan herbon ne sterku, ke ĝi pli ankoraŭ kresku! Z
sterkado ago sterki.
sterkaĵo natura aŭ fabrikita produkto same uzata kiel sterko: minerala sterkaĵo organika sterkaĵo nitrata sterkaĵo fosfata sterkaĵo verda sterkaĵo verdaj plantoj, supraĵe enterigitaj por plibonigi kulturgrundon ➞ guano.
sterkejo loko, en kiun oni amasigas fermentontan sterkon: estis iam du kokoj, unu sur la sterkejo Z ➞ sterkamaso.
trosterkado EKOL uzado en agrikulturo de tro grandaj kvantoj da sterkaĵoj, naturaj aŭ artefaritaj, kaŭzanta problemojn al la medio. ➞ eŭtrofa.