PIV 2026 · Artikolo 376

aktuala

Litero A

Derivaĵoj en la artikolo 5
  1. aktualaĵ/o
  2. aktualec/o
  3. aktualig/i
  4. aktualism/o
  5. malaktuala
aktuala
1 efektive ekzistanta en la nuntempo: potenciala signifo de vortkunmeto, kiu fariĝas aktuala dank’ al la kunteksto
2 interesa pro sia nuntempeco: verko, kiu traktas pri unu el la aktualaj sociaj demandoj Z la problemo estas aktuala, tre grava por la momento Z
1 Ne uzu aktuala en la senco de reala 1 aŭ efektiva.
aktualaĵo aktuala temo, okazaĵo k.s.: aplikado de konversacio pri aktualaĵoj anstataŭ uzado de sekaj ekzemploj ILa la televidaj aktualaĵoj elsendo inform-kanaloj en televido, kiuj tutdiurne raportas pri aktualaĵoj, trovis fidelan adeptaron SMa
aktualeco eco de io aktuala: la aktualeco de la klopodoj por la Lingvo Internacia aktualeco de la Zamenhofaj ideoj OE
aktualigi igi ion aktuala per provizo de novaj informoj aŭ principoj: la leganto mem povos aktualigi siajn sciojn FPi funde reviziita kaj aktualigita eldono OE ➞ ĝisdatigi.
aktualismo GEOL teorio, laŭ kiu la leĝoj de la nunaj geologiaj fenomenoj valoris ankaŭ en la pasinteco:hodiaŭ la aktualismo venkis la katastrofismon, eĉ se la ekzisto de katastrofaj eventoj ne povas esti neata ➞ katastrofismo.
malaktuala ne plu aktuala.