★efektiv/a

PIV · 3527

efektiv/a

1 Montriĝanta per konstateblaj efikoj; fakte rezultanta de ies ago: la vortoj havas efektivan povon.

2 Reala: vi faris al mi efektivan surprizon ; efektivaj amikoj de l’ afero ne rigardas, ĉu la afero estas jam sufiĉe «en modo» ; ili servas nur por la okazoj de efektiva bezono ; en okazo de efektiva neceseco ; tio estas efektiva eraro; efektiva plibonigo; la efektiva najtingalo estis ekzilita ; la efektiva nombro de la E-istoj . fakta.

3 (antaŭ titolo) En aktiva funkcio: la titolo de efektiva kortega kuiristino ; estis iam efektiva studanto, kiu […] .

efektive. Vere, fakte, reale: efektive, ni ekstreme bezonas plenan vortaregon ; David sendis esplorrigardantojn k konvinkiĝis, ke Saul efektive venis ; ĉu efektive Ŝimej ne estos mortigita? ; Volapük ne povis sukcesi, efektive ĝi postulis tro grandan penadon ; ĉu efektive oni devas ŝanĝi nur tiujn formojn, kiuj montriĝas kiel efektive k sendube malbonaj? .

efektivo

1 Efektivaĵo.

2 = kiomo.

efektivaĵo. Io efektiva: anstataŭ niaj belaj revoj ni spertis teruran efektivaĵon ; decidoj antikvaj fariĝis efektivaĵoj k veraĵoj . metaforo.

efektiveco. Eco de io efektiva: vitro, kiu ĉion faras centoble pli granda, ol ĝi estas en efektiveco ; tiam la tuta homaro en efektiveco prezentos nur unu genton ; ekzistas en efektiveco homoj, kiuj kun scienca aplombo […] ; tia entrepreno, kiu en la unua momento eble timigos, en efektiveco havas en si nenion danĝeran .

efektivigi. Fari, ke io estu efektiva: efektivigi intencon, planon, ideon; principoj egalaj al tiuj, kiujn mi efektivigis praktike ; post tre malmultaj jaroj la bela multemiljara revo de la homaro estos efektivigita ; mia ideo estas nur teoria: ĉu ĝi estas efektiviginda k efektivigebla, pri tio povas juĝi nur la estraro ; tio estas neefektivigebla utopio . plenumi, elfari, realigi.

efektivigo. Realigo: oni ne devas atendi kun la efektivigo de tiu intenco.

efektivigado. Tuto de la agoj, celantaj al efektivigo: unu tuj komencis la efektivigadon de la projekto .

efektiviĝi. Iĝi efektiva: mian juĝon mi prezentos al la kongreso, se tiu ĉi efektiviĝos ; ĝis la bela sonĝo (revo) de l’ homaro por eterna ben’ efektiviĝos ; la aksiomo efektiviĝis sur ŝi ; kiel hirundo forflugas, tiel senkaŭza malbeno ne efektiviĝas ; kiel mi decidis, tiel efektiviĝos .