PIV 2026 · Artikolo 8159
kompaso
Derivaĵoj en la artikolo 7
kompaso FIZI GEOD ĉia instrumento, kiu montras la magnetan nordon (en komparo kun la aliaj direktoj): plej multaj kompasoj funkcias per magnetita nadlo ➞ kompaskarto, rumbo 2, ventorozo.
Kompaso ASTR malgranda suda konstelacio. Pyxis
kompaso de deklinacio kompasa nadlo, en kiu la magneto povas moviĝi nur en horizontala ebeno, kaj kiu indikas la magnetan deklinacion.
kompaso de inklinacio kompasa nadlo, en kiu la magneto povas moviĝi nur en vertikala ebeno, kaj kiu indikas la magnetan inklinacion.
kompasujo ujo, en kiu (sub movebla kovrilo) estas tenata la vazo, en kiu troviĝas la magneta montrilo ligita al la ventorozo.
giroskopa kompaso kompaso utiliganta la direktokonstantecon de rapide rotacianta giroskopo.
magneta kompaso kompaso konsistanta el magneta pingloforma montrilo, kiu libere turniĝas ĉirkaŭ pivoto.
tangenta kompaso ELEK aparato konsistanta el kompaso en la centro de cirkla ringo kun drato, iam uzata por la absoluta mezurado de elektra fluo.