PIV 2020 · 883
anten¹o
anten1o
1 ♉ Palpa, pli-malpli fadenforma organo, troviĝanta sur la kapo de artropodoj k.a. bestoj.
2 ⚓ Longa k fleksebla stango, kiun oni fiksas al la mezo aŭ supro de masto, por teni triangulan velon.
3 ☇ Metala drato aŭ drataro, kiu servas kiel malfermita oscilcirkvito, por ricevi aŭ elsendi radiosignalojn: direkta, sendirekta anteno; jagia anteno (faskoĵeta anteno), radianta anteno; reflekta, senda, riceva anteno; surtegmenta anteno kolektiva; kadra, ombrela, prisma, ventumila anteno.
antena. Rilata al anteno: antena reto (aro da pluraj antenoj, kiujn oni ekscitas samtempe, k kiu servas por emisii aŭ kolekti energion je difinita direkto); antena rezistanco (la rezistanco de oscil-cirkvito kun la sama frekvenco kiel la anteno, kiu, se influata per egala elektromova forto, estas trafluata per la egala kurento en stato de rezonanco).
antenuloj ♉ Subfilumo (Antennata) de artropodoj, al kiu apartenas i.a. krustacoj k insektoj.