★sever/a

1 Senindulga; ne facile pardonanta k forte punanta: nia provincestro estas severa, sed justa ^Z; kontraŭ homo fiera Dio estas severa ^Z; ne en ĉiu afero estu severa ^Z; Dio longe paciencas, sed severe rekompencas ^Z; (f) severa kritiko, inspektado, verdikto; ne ĉion oni devas severe ekzameni ^Z. ☞ drakona.

2 Akre malmilda, malfacile eltenebla: severa vintro ^Z; klimato, vetero, malvarmo; severa atako de podagro; severa puno; oni lin metis en severan malliberejon ^Z; (analoge) severa batalo, konkurenco, testo; la sendungeco fariĝas ankoraŭ pli severa; negocaj aferoj estas severaj ^Z. ☞ kruela, rigora.

3 Ne toleranta deflankiĝon disde la regulo; postulanta plenan konformiĝon al la modelo, tipo, leĝo: se ni ne observos severan ordon k disciplinon, nia afero baldaŭ pereos ^Z; kun (ĉe) vero severa komercaĵo forvelkos (ne vendiĝos); severa dieto; severa unueco estas la nepra kondiĉo de nia venko; severe difinita organizacio ^Z; se ni deziras paroli severe regule ^Z; se kelkaj vortoj havas ne severe egalan formon en diversaj vortaroj ^Z. ☞ rigida, strikta.

4 (f) Senornama; senigita je ĉio nenecesa, je ĉia superfluaĵo: severa beleco; severa arkitekturo, stilo. ☞ sobra.