PIV 2026 · Artikolo 1597
baloti
baloti ntr voĉdoni per balotilo kontraste al la ceteraj manieroj de voĉdonado: oni balotos la 10an de Aprilo baloti por aŭ kontraŭ leĝpropono baloti pri la prezidanteco ➞ balotrajto.
baloto ago de iu, kiu balotas: via baloto estis neregula
balotado ago de tiuj, kiuj balotas: sekreta balotado publika balotado decido estis atingita nur ĉe la tria balotado kontrolantoj de la balotado ➞ elekto.
balotejo ĉambro aŭ konstruaĵo, en kiu oni balotas: longaj vicoj formiĝis ekster la balotejoj SLm okazos en dek unu balotejoj la voĉdonado OE ➞ balotbudo.
balotilo paperpeco, globeto aŭ simila objekto, per kiu voĉdonanto esprimas sian opinion: pluraj balotiloj estas erare metitaj en malĝustajn kestojn BSe multaj voĉdonantoj senvalorigis siajn balotilojn per negativaj komentoj GMc Sin. voĉdonilo.
balotujo ŝlosita kesto kun fermebla maldika aperturo, por kolekti balotilojn. Sin. urno 3.
rebaloto dua baloto aranĝita, kiam la unua ne donis validan rezulton.