PIV 2026 · Artikolo 1093

★argumenti

Litero A★ Fundamenta

Derivaĵoj en la artikolo 6
  1. argumento
  2. argumentad/o
  3. argumentar/o
  4. kontraŭargumenti
  5. kontraŭargumento
  6. kontraŭargumentad/o
★ argumenti
1 ntr prezenti argumentojn; provi demonstri per argumentoj: ili senfine argumentas, kaj neniu konvinkas alian batanto povas argumenti, batato devas silenti Z ➞ diskuti, rezoni; kontesti.
2 tr prezenti ion kiel argumenton: ili argumentas lian nescion pri la faktoj oni povas proponi forigon de la artikolo kaj de la akuzativo, argumentante, ke ekzistas lingvoj, kiuj vivas tre bone sen ili ➞ preteksti, pruvi.
argumento
1 rezona pruvo prezentata en diskuto: se niaj argumentoj estas ĝustaj, akceptu ilin, — se ili estas malĝustaj, forĵetu ilin Z ĉu per tio liaj argumentoj perdas sian valoron? Z la argumentoj, per kiuj oni kontraŭ tio ĉi batalas Z refuti argumenton
2 MATE KOMP elemento, por kiu funkcio estas difinita; variablo, de kiu funkcio dependas.
3 MATE pri kompleksa nombro z nombro t, tia ke z = reit por iu r ⩾ 0 (oni tiam skribas t = arg(z).
argumentado metoda rezonado aŭ diskutado per argumentoj: argumentado pri io instrui la metodojn de sukcesa argumentado kaj konvinkado ILa
argumentaro MATE la aro 2 de ĉiuj punktoj, kie funkcio estas difinita.
kontraŭargumenti tr argumenti kontraŭ io: mi tute ne estas devigata daŭre kontraŭargumenti MalR mi taksis mian devon almenaŭ iomete kontraŭargumenti tiun lavangon da misinformoj kaj mensogoj ADG kontraŭargumenti al liaj publikaj kaj retaj asertoj OE
kontraŭargumento kontraŭa argumento: diskuti la argumentojn kaj kontraŭargumentojn de ambaŭ starpunktoj ILa
kontraŭargumentado kontraŭa argumentado: unue oni eksponas ĉiujn faktojn kaj poste sekvas la argumentado kaj kontraŭargumentado en formo de persvado kaj refuto ILa