PIV 2026 · Artikolo 6603
★insidi
Derivaĵoj en la artikolo 4
★ insidi tr prepari sekrete ruzan rimedon por trompi kaj malutili iun: li insidas, por kapti malriĉulon MT insidi kontraŭ la virto de virino ne insidu kontraŭ la domo de virtulo MT neniu vidas, kio lin insidas ne atendita malfeliĉo Z ➞ atenci, embuski, konspiri.
1 Embuski havas esence la signifon de milita aŭ perarmila atako celanta la malliberigon aŭ la mortigon de iu. Insidi koncernas precipe neperfortajn atakojn kontraŭ ies honoro, feliĉo, riĉeco k.s.
insida enhavanta insidojn: insidaj karesoj insidaj demandoj insidaj rezonoj insidaj atakoj virino plena de insida kaj subtila ĉarmo li sidas inside en kaŝita loko MT
insido ago insidi kaj ties rezulto: malvirtuloj, kiuj faras insidojn, starigas pereigajn kaptilojn MT ili faras insidon kontraŭ li MT la demandoj de la enketisto estis plenaj de insidoj insido pri sango MT ➞ artifiko, reto 1, kaptilo.
2 Artifiko diferencas de insido per tio, ke ĝi difinas nur malgravajn detalajn trompaĵojn, ekz. falsan pesadon, mensogon k.s.; cetere oni aranĝas artifikon pli por sia propra profito ol por aliula malprofito, dum per insido oni celas ĉiam kaj antaŭ ĉio la malutilon de aliulo.
insidema inklina insidi: insidema fiadvokato procesema kaj insidema individuo ➞ ĉikanema.
mortinsidi insidi por iun mortigi.