★respekt/o

PIV · 13387

respekt/o

1 Sento, kiun oni havas pri la alta kvalito de io, k kiu igas onin eviti atenci aŭ spiti ĝin: submetiĝi kun respekto al la volo de Dio; ili agas tiel nur el senkonscia respekto antaŭ sia hereda ideo ; mi vidis, kiom malmulte da respekto vi havas por la (edzeca) ligo, kiu nin unuigas ; (moro), al kiu oni devas rilati kun la plej granda respekto .

2 Sento de profunda estimo, kiun oni havas antaŭ persono pro ties supera karaktero aŭ rango: dirinte adiaŭ al M. per saluto plena de respekto ; tion mi diras nur pro respekto al via moŝto; eksteraj signoj de respekto; malgraŭ mia profunda respekto al vi, mi diros […]; respekto mortigas la historion; li perdis eĉ la respekton antaŭ si mem.

respekti () Trakti kun respekto

1 ion: esploru ĝis la arbareto de la diin’, sed sanktan la profundon respektu ; respektanta ordonon estos rekompencita ; li respektis la silentan suferon de la malriĉa virino ; mi ne respektis la donojn de via beno ; la arbo devas esti respektata, diradis la gemaljunuloj ; respekti ies dezirojn, sian promeson . atenti, konsideri, observi.

2 iun: la patron k patrinon mi respektis ; mi tro multe vin respektas, por ke mi faru ion similan ; respektu en li la reĝon ; la respektata kapo de la reĝo . adori, estimi, ŝati.

respekta. Esprimanta respekton: la libristo faris respektan saluton .

respekte. En respekta maniero: S. respekte alproksimiĝas k stariĝas genue ; tri maljunaj viroj respektplene iris antaŭ la sanktan ŝrankon ; lasu min kapti respektege la objekton de nia celo .

respektego. Tre granda respekto, ŝuldata al superuloj: ili volas prezenti al vi sian respektegon .

respektinda. Inda je respekto: via respektinda moŝto; la respektindeco de maljuna pastro.

malrespekti. Havi malaltan opinion pri ies morala valoro k montri tion per sia konduto: malrespekti la reĝan majeston; kruele ofendita, malrespektita maljunulo ; kun malrespekta rideto.

memrespekto. Konscio pri sia respektindeco.

nerespekto. Manko de respekto.

trorespekta. Montranta servemaĉan respekton.