PIV 2026 · Artikolo 4850
★frosto
Derivaĵoj en la artikolo 16
★ frosto
1 tiagrada malvarmo, ke ĝi glaciigas akvon: urtikon frosto ne difektas Z malsata kaj tremanta de frosto la kompatinda knabineto Z de la spiro de Dio venas frosto MT METE disradia frosto estiĝanta per disradiado dum klara kaj serena vetero ➞ frostomorti, frostomalvarma, frostosuferi, frostotremi, frostopunkto.
2 sensaĵo simila al tiu de granda malvarmo: li eksentis froston de timo en la dorso Z frosto ekkuris sub niaj haŭtoj Z frosto lin atakis li ektimegis Z
frosta glaciige malvarma: frosta vetero frosta vento la frostaj dezertoj de la poluso hodiaŭ estas bela frosta vetero, tial mi prenos miajn glitilojn FE
frosti
1 ntr esti froste: ĉi tie estas malvarme, frostas! Z tie frostis ankoraŭ kelke da gradoj pli ol en la urbo Z kiel mi frostas, kiel terure, kiu povus helpi? FSz
frostema frostosentema.
frostiga estiganta froston: KEMI frostiga miksaĵo miksaĵo el glacio kaj salo, kiu malvarmiĝas pro la malaltiĝo de la fandiĝtemperaturo kaj servas por malvarmigi aliajn substancojn
frostigi
1 fari ion glaciige malvarma: akra venteto, kiu tranĉetis lian vizaĝon kaj lin frostigis ĝis ostoj HVa sketado sur la frostigita lago MGr kriogeniko estas proceduro frostigi kaj konservi kadavron Ko Sin. glaciigi 1. ➞ kongeli.
2 (figurasence) haltigi, malhelpi aŭ senaktivigi: la glacio, kiu frostigis la sentojn en ŝia brusto, fandiĝis Z Usono, la ĉefa financanto, frostigis sian kontribuon OBu dekreto, kiu frostigis la plialtigon de la pensimono MD
frostigado procedo de konservado de nutraĵoj per rapida malvarmigado ĝis −24 °C.
frostigilo TEKN tiu parto de fridujo, kiu tenas sian temperaturon sub 0 °C.
frostiĝi
1 esti malmoligita, rigidigita aŭ difektita de malvarmo: iu el ili hirundoj malfruiĝas, tiam ĝi frostiĝas tiel, ke ĝi falas kvazaŭ senviva Z la frostiĝintaj fingroj ne plu povis teni la plumingon
2 (figurasence) esti haltigita: ilia gajeco frostiĝis ĉe tiu terura vido frostiĝis diplomatiaj rilatoj IsT KOMP la programo frostiĝis ĉesis respondi al la uzanto
➞ glaciiĝi.frostujo malvarmiga ŝranko por konservi manĝaĵojn frostigitaj, eventuale parto de fridujo. ➞ glaciujo.
alfrostiĝi iĝi solida pro frosto: la rivero jam alfrostiĝis
elfrostigi KEMI apartigi komponanton el miksaĵo per malvarmigo.
elfrostiĝi KEMI apartiĝi el miksaĵo pro frostiĝo.
enfrostiĝi esti kaptita de frostiĝinta likvo: la anasido kuŝis tute senmove kaj tiel enfrostiĝis fortike en la glacion Z
forfrostiĝi plantoj k.s. detruiĝi pro frosto.
superfrostigado procedo de konservado de nutraĵoj per rapida malvarmigado ĝis −40 °C.
trafrosti tr plene frostigi 1: ili estas preskaŭ trafrostitaj OE