PIV 2026 · Artikolo 4851
★froti
Derivaĵoj en la artikolo 18
★ froti tr tuŝadi ion, tien kaj reen premŝovante sur ties supraĵo alian objekton:froti pargeton per vakso ŝi frotis Elizon per suko de juglando Z li pro ĝojo frotis al si la manojn Z ➞ frotlavi, frotpurigi, frotvundo; grati, poluri, skrapi, ŝmiri, viŝi.
froto
1 ago froti.
2 FIZI TEKN rezisto de du korpoj, kiujn oni ŝovas unu sur la alia: dinamika froto statika froto pivota froto interna froto ➞ frotelektro, frotkoeficiento.
frotadi fari frotadon.
frotado
1 agado froti.
2 maniero masaĝi, kiu konsistas el ir-reira movo de la mano kun sufiĉa premo, por ke la tegumentoj estu ŝovataj.
frotaĵo
1 BELA maldika travidebla tavolo de farbo, parte surmetita sur alian.
2 BIOL MEDI sternaĵo de organisma likvo sur muntovitro por mikroskopa ekzameno.
3 ero de iu substanco, rezultanta de frotado: mikroskopa frotaĵo de ŝu-ciro CPi
froteti tre supraĵe kaj delikate froti. ➞ tanĝi.
frotiĝi iĝi aŭ esti frotata.
frotisto laboristo, kiu frotas pargetojn.
frotita (figurasence) multesperta: frotita kaj polurita Z
defroti
1 supraĵe difekti ion per froto: defroti la haŭton
2 forigi ion per frotado.
defrotaĵo difekto kaŭzita de frotado: ricevi defrotaĵon Sin. frotvundo.
defrotiĝi iĝi defrotita: la surskribo sur tomba ŝtono preskaŭ tute defrotiĝis Z
disfroti pisti aŭ pulvorigi per frotado: (figurasence) mi disfrotos lin al polvo Z
elfroti purigi ion eligante malpuraĵojn per frotado: ŝi elfrotis la kaldronon per la serpentoj, kiujn ŝi kunligis en unu tuberon Z
enfroti enigi ion per frotado: mi devis enfroti al mi poste bonan porcion da tabako Z li enfrotis al ŝi la ŝmiraĵon en la piedon Z
interfroti froti objektojn unu kontraŭ la alia(j): interfroti la manojn SPo
interfrotiĝi froti unu la alian: ĉio interfrotiĝas kaj kolizias SSz
preterfroti maldelikate tuŝi ion preterpasante: ŝi evitadis la manojn de la pasantoj, ŝi preterfrotadis ilin Z