PIV 2026 · Artikolo 6700
★iom
Derivaĵoj en la artikolo 7
★ iom
1 kvanto aŭ nombro nedifinita, sed plej ofte malgranda: donu al mi iom da teo donu al mi iom da pano prenu iom el la sango MT mi volus havi iom de tiu kuko mi volus havi iom el via riĉeco iom da tempo en ĉiu malbono estas iom da bono Z ➞ ero, floko, grajno, guto, ombro.
2 grado aŭ mezuro nedifinita, sed plej ofte malalta: post du horoj ĝi la forno estis nur iom varmeta FE iom malfrue mi ankaŭ aŭdis, kaj mi iom kredas Z per helpo de vortaro mi tamen komprenis iom vian leteron FE iom post iom laŭ nepercepteblaj gradoj Z kun la tempo la formo nova iom post iom elpuŝos la formon malnovan, kiu fariĝos arĥaismo ➞ guto, paŝo FA
ioma estanta en ia kvanto, ĝenerale malgranda: tiu ĉi sola penso estis por li ioma konsolo LiZ mi pacience atendis dum ioma tempo ALö
iomo nedifinita kvanto, ĝenerale malgranda: nur iomo estas dirinda pri la tekniko ILa
iomete nur malmulte: mi parolas iomete la anglan restas nur iomete da vino atendu ankoraŭ iomete
iometo tre malgranda kvanto: nur iometon ni aŭdis pri li MT via iometo da kuraĝo Z ➞ atomo, grajno, guto, ombro.
iompostioma, iom-post-ioma okazanta iom post iom: helpi al iom-post-ioma unuiĝo de la homaro Z Sin. grada 2, laŭgrada. ➞ progresiva.
kelkiom (malofte) kelke: mi bedaŭras pri kelkiom da neologismoj OE