PIV 2020 · 80
★aĉet/i
★aĉet/i (tr)
1 Akiri kiel propraĵon per pago de mono: aĉeti ion de iu, disde iu; la kampo k la kaverno […] aĉetitaj de el la filoj de Ĥet X; aĉeti teon por unu franko Z; David aĉetis […] bovojn pro 50 sikloj X; aĉeti birdojn kontraŭ kelkaj spesdekoj; ĉiujn ĉi bienojn li aĉetis per la heredaĵo de sia patro; (abs) aĉeti firme, kontante, kredite; marĉando aĉeti ne devigas Z.
2 Akiri per mono la uzon de io, la ĝuon de iu: aĉeti saĝon X, amon Z; alia vidas en mi nur nemalbelan virinon, kiun oni povas aĉeti Z.
3 Subaĉeti: la E-istaro nun estas tro granda, por ke kelkaj aĉetitaj personoj povu multe fari Z.
aĉeto. Unuopa ago de tiu, kiu aĉetas: dum ŝi faris siajn aĉetojn Z (en butiko); mi ne povas permesi al mi la aĉeton de tiu luksaĵo.
aĉetado. La komerca agado de tiu, kiu regule aĉetas: grupo de laboristoj por komuna aĉetado.
aĉetanto. Tiu, kiu aĉetas: ju pli da aĉetantoj, des pli alta la prezo Z; konstanta aĉetanto (regula kliento).
aĉetebla. Povanta esti aĉetita: aĉetebla domo; aĉetebla juĝisto.
aĉetejo. Vendejo.
aĉetisto. Tiu, kiu profesie aĉetadas por iu firmo.
elaĉeti
1 Pagi, por liberigi iun el kaptiteco: ĉe la Romanoj la sklavoj povis sin elaĉeti; ni elaĉetis niajn fratojn, kiuj estis venditaj al la nacioj X; (f) senpage vi estis vendita, k ne per arĝento vi estos elaĉetita X; la elaĉetitoj de la Eternulo revenos X.
2 ✞ Liberigi el peka stato: Kristo elaĉetis nin el la malbeno de la Leĝo N; la Elaĉetinto (Savinto).
elaĉeto. Ago de tiu, kiu elaĉetas, k ofero tiucele farita: frato ne donos elaĉeton por li X; (f) la Filo de homo venis […] por doni sian vivon kiel elaĉeton por multaj N; nekredebla estis la elaĉeta mono, kiu estis postulata Z.
foraĉeti. Akapari.
retroaĉeto. Fino de longedaŭra vivasekura poliso, fare de asekurito, antaŭ la fino de la limtempo.