PIV 2026 · Artikolo 8848

kulturi

Litero K

Derivaĵoj en la artikolo 15
  1. kultura
  2. kulturo
  3. kulturad/o
  4. kulturej/o
  5. agr/okulturo
  6. akv/okulturo
  7. arb/arkulturo
  8. ĝardenkulturo
  9. motorkulturo
  10. senkultura
  11. senkulturej/o
  12. subkulturo
  13. terkulturo
  14. terkulturad/o
  15. terkulturist/o
kulturi tr
1 prilabori teron aŭ akvon por produkti vegetaĵojn: kulturi agron kulturi ĝardenon kulturi akvon ➞ bredi, farmi.
2 (evitinde) = kultivi.
3 perfektigi la spiritan evoluon de homo per racia edukado: la Helenoj estis frutempe kulturataj de fremduloj el Kreto kaj Egiptujo kulturita nacio klasike kulturita verkisto ➞ civilizi, klerigi; kulturejo.
4 SOCI sociigi iun; internigi al iu sociajn normojn de ia komunumo.
kultura
1 havanta kulturon: ĉiuj nuntempaj kulturaj popoloj Z fama kultura ĉefurbo Z uzi inter si la plej kulturan lingvon Z
2 celanta disvolvi kaj propagandi apartajn formojn de kulturo 4: kulturaj institucioj Z kulturaj rilatoj kultura revolucio
kulturo
1 ago kulturi.
2 (evitinde) = kultivado.
3 MEDI aplikado de speciala traktado por favori la fizikan evoluon: korpa kulturo gimnastiko, korpflegado ktp ➞ sporto.
4 kolektiva neheredita sciaro (tradicioj, kutimaj manieroj agi kaj pensi k.s.) amasigita, konservita kaj transdonita de ĉiu el la diversaj homaj grupoj (etnaj, religiaj, sociaj k.a.) aŭ de la tuta homaro: kulturo estas sento de komuneco, kiu baziĝas sur tradicio reala aŭ kreita kaj esprimiĝas pere de produktoj spiritaj kaj artaj, inter kiuj la lingvo ludas gravan rolon WAu la naturaj kapabloj disvolviĝas per kulturo antikva kulturo kristana kulturo humanisma kulturo socialisma kulturo por ke ĉiuj dezirantoj povu ĉerpi kulturon Z kiam ili la nigruloj atingos potencan gradon da de kulturo Z la celoj de neŭtrale-homa kulturo Z
1 Kulturo estas precipe spirita, civilizo estas ankaŭ materia; kulturo postulas komprenon pri belartoj k.s., civilizo postulas krome la mildiĝon de la sociaj rilatoj, krom la teĥnika perfektiĝo de la vivrimedoj.
kulturado agado kulturi.
kulturejo
1 loko, kie oni kulturas: kulio venis al mi por vendi malgrandan katidon, kiun li kaptis en la kulturejo MalR
2 loko, kie oni kulturas: gentlingvaj kulturejoj Z UK-oj estas kulturejo por Esperanto, servejo por turismo, montrofenestro por la ekstera mondo kaj laborkunvenejo por Esperantio ULi
agrokulturo kulturo de tero aŭ de kampoj: la agrokulturo estas la bazo de nia tuta vivo ➞ agrikulturo.
akvokulturo kulturo 1 de akvo por kreskigi aŭ multobligi plantojn aŭ bestojn.
arbarkulturo (evitinde) = arbarkultivo.
ĝardenkulturo metia kulturado de ĝardeno.➞ agrikulturo.
motorkulturo kulturo de grundo per motorhavaj maŝinoj.
senkultura ne konanta kulturon: senkultura krudulo senkultura tribo
senkulturejo parto de grundo, kiun oni lasas sen kulturado dum kelka tempo, por ke ĝi ripozu. ➞ novalo.
subkulturo kultura grupo ene de pli granda kulturo, ofte kun la propraj kredoj kaj interesoj.
terkulturo, terkulturado kulturado de tero. ➞ farmado, kulturmaŝino.
terkulturisto iu, kies metio estas kulturado de tero.