PIV 2026 · Artikolo 11104

★nubo

Litero N★ Fundamenta

Derivaĵoj en la artikolo 13
  1. nuba
  2. nubeg/o
  3. nubet/o
  4. nubiĝ/i
  5. ard/a nubo
  6. elektronnubo
  7. fung/onubo
  8. inter/stel/a nubo
  9. Magelan/a Nubo
  10. Grand/a Magelan/a Nubo
  11. Mal/grand/a Magelan/a Nubo
  12. plennuba
  13. sennuba
★ nubo
1 amaso de kondensita akvovaporo pendanta en la supra atmosfero kaj kaŝanta la ĉielon: la unua radio de la suno trarompis la nubon Z (proprasence kaj figurasence) granda nubo, malgranda pluvo Z lia favoro estas kiel nubo kun printempa pluvo MT la akvo bruis en la profundo, la nuboj kuŝis sub li Z kiel nubo foriris mia feliĉo MT ho senmortuloj, vi, kiuj pasigas
Feliĉajn tagojn super puraj nuboj Z
POEZ se lia grandeco eĉ atingus ĝis la ĉielo, kaj lia kapo tuŝus la nubon MT ➞ ciruso, kumuluso, nimbuso, stratuso.
2 (analoge) densa amaso el relative etaj aĵoj, kiu malhelpas klaran vidon: tie iras fumo per densaj nuboj proprasence kaj figurasence: io tre suspektinda Z nuboj el incenso nubo da polvo nubo da korvoj nubo da akridoj nubo da ŝipetoj B nubo da fumoj LiZ ➞ nebulo.
3 (figurasence) io, kio malserenigas, maltrankviligas, malĝojigas aŭ malklarigas la psikon: tiu malkonsento metis nubon en ilian amikecon nubo pasis sur lia vizaĝo B nubo sur ilia feliĉo nubo da ĉagreno kovris lian frunton droni en nuboj kaj ĥimeroj ➞ nebulo, ombro, vualo.
nuba
1 konsistanta el nubo(j); la Eternulo iradis antaŭ ili en nuba kolono MT dikaj nubaj tavoloj sterniĝis sub la aviadilo malalta nuba tegmento (figurasence) la nuba palaco de Fata-Morgano Z
2 kovrita per nuboj: nuba ĉielo nuba vetero ➞ nubkovrita.
3 rilata al nuboj: la nuba elektro nubaj specoj METE la nuba indico de Boforto
4 (figurasence) malklara; vide konfuza: malgaja kaj nuba rigardo B nuba estonteco
nubego dika nigra nubo.
nubeto blanka malgranda nubo: nenia nubeto troviĝis sur la ĉielo Z anĝelo, sidanta sur sia nubeto, psalmis
nubiĝi iĝi kovrita de nuboj: nubiĝis la horizonto lia frunto nubiĝis
arda nubo GEOL = (prefere) vulkanklasta fluo.
elektronnubo FIZI regiono ĉirkaŭ atomkerno, en kiu estas tre probable, ke tie troviĝas la elektronoj de la atomo.
fungonubo nubo el fumo, akvovaporo kaj disrompaĵoj post granda eksplodo. ➞ fungoforma.
interstela nubo ASTR koncentriĝo de gaso en la interstela spaco, havanta denson ĝis milionoble pli granda ol la averaĝa denso de la interstela materio, kaj kie ofte naskiĝas steloj.
Magelana Nubo ASTR iu el du galaksioj satelitaj de la nia, kune nomataj la Magelanaj Nuboj, je distanco de 170 000 lumjaroj). ➞ Magelano.
Granda Magelana Nubo la pli granda el la du Magelanaj Nuboj.
Malgranda Magelana Nubo la pli malgranda el la du Magelanaj Nuboj.
plennuba tute kovrita de nuboj.
sennuba ne prezentanta ian nubon: la mediteranea sennuba lazuro (figurasence) la sennuba idilio de ŝia infaneco Z ➞ pura 1.