PIV 2026 · Artikolo 15235
★ŝuti
Derivaĵoj en la artikolo 18
★ ŝuti tr
1 elglitigi nelikvan substancon, kiu konsistas el multaj apartaj nekunigitaj eroj: ŝuti grenon en sakon B ŝuti sablon sur teron B ŝuti salon en supon B lia edzino sternis kovrotukon super la aperturo de la puto kaj ŝutis sur ĝin grion, por ke oni nenion rimarku MT ĉie, kie bona mano estis ŝutinta panpecetojn por la birdoj Z ŝi metis grandajn branĉojn sur lin kaj ŝutis sur tion foliojn Z la vento ŝutas al ŝi floraĵojn sur la harojn Z ➞ ŝutloko, semi, verŝi.
2 (figurasence) grandnombre aŭ grandakvante doni ion: ŝuti komplimentojn al la aŭtoro Z
ŝutado agado ŝuti: ŝutado de sablo sur la glaciaj stratoj
ŝutaĵo TEKN materialo, kies detalaj pecoj havas tian formon kaj grandecon, ke oni povas facile ŝuti ilin.
ŝutiĝi iĝi ŝutata: la sako krevis kaj la greno ŝutiĝis sur la plankon
ŝutiĝema facile ŝutiĝanta: ŝutiĝema hararo Z
ŝutilo ĉia ilo por ŝuti. ➞ ŝovelilo.
alŝuti
1 ŝuti ion direkte al io aŭ iu: (figurasence) li alŝutis novajn informojn al enketistoj SPo
ĉirkaŭŝuti abunde ĉirkaŭi ion per io: (figurasence) la grekoj, kvankam ĉirkaŭŝutataj per liaj favoroj, tamen insultas lin FK
deŝutilo AGRI tiu parto de plugilo, kiu ŝutas la teron flanken.
disŝuti disigi ion ŝutante: semante, disŝuti grenon sur kampo B disŝuti semon Z kolekti per balailo la disŝutitan cindron
disŝutiĝi iĝi disŝutita: (figurasence) la amaso disŝutiĝis kaj kuras en diversajn flankojn MT
elŝuti
1 eligi ion ŝutante: li levis la urnon kaj elŝutis ĝian enhavon sur oran pladon B elŝuti sablon el kamiono
elŝutiĝi eliĝi amase: oraj harfasketoj el sub la ĉapelo elŝutiĝis sur la blankan frunton Z (figurasence) ĉi tiu frapis lin en la ventron tiel, ke liaj internaĵoj elŝutiĝis sur la teron MT
forŝuti forigi ion ŝutante: arb’ maljuna, kiu de l’ folioj forŝutas lastan reston KKa
kunŝuti kunigi ion ŝutante: kunŝuti ŝtonojn senorde B li kunŝutis la karbon en grandan amason
motorŝutilo = (prefere) baskulkamiono.
superŝuti
1 tre abunde kovri per ŝutado: superŝuti kadavron per tero B
surŝuti parte aŭ plene kovri ion ŝutante ion sur ĝin: surŝuti la aleojn per sablo planko surŝutita per floroj B
surŝuteti iomete surŝuti ion: surŝuteti kukon per sukero