PIV Reta Vortaro

PIV 2020 · 11550

pac/o

1 Stato de regno, nacio aŭ alia homgrupo, kiu ne estas militanta kontraŭ alia: se vi volas pacon, preparu pacon; se paco ĉiam ambaŭ la popolojn ligu plej trankvile […] ; li sukcesis do akiri la pacon por la Samosanoj ; Mi donos pacon al via lando ; li havis pacon kun ĉiuj ĉirkaŭaj landoj ; en tempo de paco; rompi la pacon; armita paco (dum kiu ĉiu sin pretigas por milito); packondiĉoj, packontrakto.

2 Stato de anaro (nacio, gento, familio, societo ), inter kies anoj ekzistas nenia malakordo aŭ malkonsento: por interna paco en ia lando […] ; ni kreis pacon k unuecon ; geedzoj en paco vivas en reĝa palaco ; paco estu inter viaj muroj! ; mi venis, por enkonduki ne pacon, sed glavon ; ili foriris de li en paco ; iru en paco! ; () paco estu en la arbaro! . akordo, harmonio, konkordo, konsento.

3 Stato de psiko, kiu ne estas maltrankviligata de zorgoj, timoj : miaj instruoj […] akirigos al vi jarojn de vivo k paco ; mia animo estis forpuŝita for de paco, bonstaton mi forgesis ; kiam la paco de la dormo kuŝis super la denove feliĉa domo ; paco estis sur la vizaĝo de la mortinto ; () paco al lia cindro! (li ripozu trankvile!).

paca

1 Estanta en paco 1 aŭ 2: ili estas pacaj kun ni ; pacaj kunvenoj, diskutoj; kiuj parolas pace kun siaj proksimuloj .

2 Celanta pacon: nia diligenta kolegaro en laboro paca ne laciĝos ; pacaj paroloj.

3 Ne maltrankviliganta la animon: lasu min en vivo paca! ; paca silento, ke ne blovas eĉ vento ; ŝi ankaŭ iam estis en tia paca, flora, ombra kampejo ; Paca Oceano (Pacifiko). kvieta, serena.

pace. En paca maniero: pace ripozi; estis pace k trankvile en la buduareto; ĉiujn dubajn demandojn […] solvu ĉiam pace per regula interkonsiliĝo .

pacema. Inklina esti paca: neincitiĝema, pacema karaktero.

pacigi

1 Fari iu(j)n paca(j): federaciismo estas la sola rimedo por pacigi Eŭropon; kiam al la Eternulo plaĉas homo, Li eĉ liajn malamikojn pacigas kun li ; feliĉaj estas la pacigantoj! ; () pacigi la logikon kun la tradicio , la prudenton kun la rimo.

2 Ĉesigi ion, kio kontraŭstaras la pacon: pacigi malpacon , kverelon, ribelon.

paciga. Tia, ke li, ŝi, ĝi starigas pacon: paciga juĝisto; pacigaj admonoj.

paciĝi. Iĝi paca: Di’ k pekulo paciĝas en sincero ; unue paciĝu kun via frato k poste venu k prezentu vian oferon ; () li forflugis, k la malgranda Ido paciĝis kun tio, ĉar ŝi devis paciĝi ; mi ne povas paciĝi kun tia ideo!.

paciĝo. Aranĝo paca, interkonsento: venas paciĝo post malpaco ; juĝo komencita paciĝon ne malhelpas .

pacismo. Pacifismo.

pacisto. Pacifisto.

paculo. Homo, kiu vivas en paco aŭ ŝatas, deziras pacon.

interpaco. Provizora paco inter du militoj, konfliktoj .

interpacigi. Pacigi reciproke: religia unuiĝo, kiu interpacigus ĉiujn ekzistantajn religiojn .

malpaco. Rilato inter du aŭ pluraj personoj aŭ homgrupoj, karakterizata de malamikaj agoj, paroloj aŭ intencoj: la reciproka malpaco inter la homoj neniam ĉesos, ĝis la homoj alkutimiĝos starigi la nomon «homo» pli alte ol la nomon de gento ; demando, kiu vekis tiom multe da disputoj k malpaco inter la E-istoj ; fari savantan oferdonon al la dio de malpaco ; ili ne plu semos inter vi malpacon ; ia malpaco inter mi k la organizantoj ; mi ne volas komenci malpacon pro tio ; malpaco pro limo fariĝas kutimo, malpaco pro kredo fariĝas heredo ; konsento konstruas, malpaco detruas ; neniam okazis inter ili ia malpaceto . milito, malkonsento, malkonkordo.

malpaci () Esti en stato de malpaco: pli bone estas havon fordoni, ol kun homoj malpaci ; pro limoj k baroj malpacas najbaroj ; malpacinte kun sia edzino, li eksedziĝis je ŝi ; () estintaj amikoj plej kruele malpacas ; ne eterne Mi malpacas ; se silentas draŝejo, malpacas loĝejo (pro malsato).

malpacema. Inklina al malpaco: malpacema edzino estas kiel konstanta gutado .

malpacigi. Fari malpaca(j): la tro nepreciza vorto «popolo» […] ofte malpacigas inter si la filojn de la sama lando .

malpaciĝi. Komenci malpacon kun iu(j): pro tio ili malpaciĝis ; malpaciĝinta frato .

repacigi. Meti denove en pacan staton: repacigi la koleran Dion ; malsaĝulo malpacigis k dek saĝuloj repacigi ne povas ; ni estas repacigitaj kun Dio per la morto de Lia filo ; timu lupon edukitan k malamikon repacigitan ; ĉu eblos repacigi la popolojn de eksa Jugoslavio? ; nerepacigebla opoziciulo.