PIV 2026 · Artikolo 6508
indiki
Derivaĵoj en la artikolo 21
indiki tr nerekte montri ion por informi: steleto en PIV indikas Fundamentajn vortojn glui afiŝojn por indiki la vojon al la kongresejo indiki la horon, tagon kaj lokon de kunveno barometro indikas la aerpremon la temperaturo indikata de eksterdoma termometro tio estis indikita al ni de la kuracisto ➞ montri, difini, marki, sciigi.
indika rilata al indiko: indika fosto indika simptomo MATE indika funkcio de aro
indiko
1 ago indiki.
2 informo indikata: la aparato liveras fidindajn indikojn bibliografiaj indikoj la temperaturo de la korpo estas grava indiko en ĉiu malsano obei la indikojn de recepto
indikaĵo
1 io, kio povas indiki ian informon: la komparo de la malneta enlanda produkto (MEP) de diversaj landoj restas la sola plej certa indikaĵo de progreso EGv multaj indikaĵoj pensigas, ke en la altaj instancoj oni taksas, ke la solvo estas ne akcepti alian lingvon ol la anglan kiel komunikilon CPi
2 JURO konstatita fakto, kiu verŝajnigas la realecon de ĉefa fakto, kaj kiu estus malfacile klarigebla per alia supozo: la letero videble estis skribita mane. La policaj skribspecialistoj tiel havos indikaĵon por trovi la sendinton CPi la pruvo per la indikaĵoj estas la plej malforta ➞ atestaĵo, pruvo, konfeso.
indikanto
1 KEMI substanco, kiu indikas certan stadion en procezo: fenolftaleino estas indikanto ĉe titrado de acidoj kun alkaloj, ĝi indikas la neŭtralecan punkton
2 EKOL bioindikanta vivulo.
indikilo
1 objekto, per kiu oni ion indikas: en la biblioteko, la indikiloj montriloj kaj ŝildoj estas en la skota GMc estas universale tre probable, ke la indikilo de la pluralo staras inter la radikalo kaj la indikilo de la akuzativo JWe
2 indikaĵo 1: tiuj kaj aliaj ŝlosilaj donitaĵoj estas rivelataj de la indikiloj pri la nivelo, strukturo kaj kresko de la monda industria produktado EGv atestas pri tio multaj indikiloj, kiel la malkresko de investo, kaj la eksplodo de la komerca deficito MD
akvonivela indikilo indikilo montranta la nivelon de akvo en maŝino.
bioindiki EKOL vivulo indiki modifon de la medio i.a. sekve de homa agado: likenoj bioindikas atmosferan poluadon
bioindikanto indikanto 2.
deklivecindikilo TRAF ŝildo apud fervojlinio aŭ ŝoseo, kiu montras, en kioma grado sekvas alsupra aŭ desupra parto.
direktoindikilo VETU direktomontrilo.
ĝirindikilo (evitinde) = direktomontrilo.
horizontalindikilo AVIA instrumento indikanta la angulojn de la longakso kaj transversa akso de aviadilo en flugado, rilate al la vertikalo.
incidindikilo AVIA instrumento indikanta la angulon, en plano de simetrio inter la trajektorio kaj la longakso de aviadilo.
kapusindikilo AVIA instrumento, kiu indikas ĉian ŝanĝiĝon en la direkto de aviadilo for de la rekta vojo. ➞ kapuso.
kontraŭindiko MEDI aparta cirkonstanco, kiu malhelpas la uzon de iu kuracilo.
nivelindiko alto de la akvosurfaco, legata je nivelskaloj ĉe diversaj punktoj de riverfluo.
paĝindikilo legosigno.
prezindiko slipo aŭ afiŝeto alkroĉita al varo kaj indikanta la prezon.
rapidindikilo instrumento indikanta la rapidon de veturilo, aviadilo, ŝipo k.s.
turnindikilo direktomontrilo.
uzindiko uzinstrukcio.