PIV 2026 · Artikolo 16103

★tubero

Litero T★ Fundamenta

Derivaĵoj en la artikolo 8
  1. tubera
  2. tuberaĵ/o
  3. tuberet/o
  4. sebum/a tuberet/o
  5. tuberiĝ/o
  6. hartubero
  7. lign/otubero
  8. mult/otuberul/o
★ tubero
1 ĉiuspeca bulforma elstaraĵo aŭ ŝvelaĵo sur la surfaco aŭ en la interno de io: la plej supre elstaranta roka tubero Z tuberoj de ligna bastono la ĉaro skuiĝis sur la tuberoj de la kampara vojo tiu lignopeco estas ne utiligebla, pro la tromulto da tuberoj, kiuj estas en ĝi diris la palisoj de la barilo, « ni havas en ni nodojn kaj tuberojn!» Z absceso estas ankoraŭ fermita tubero kun puso Z bati al si tuberon sur la frunto ➞ kontuzo (figurasence) estas tubero en la afero io ne iras glate Z ➞ ĝibo, veruko.
2 BOTA bulforma aŭ ŝvela parto de tigo 1, kolo 4 aŭ radiko 1, plena de rezervoj kaj plej ofte subtera: tiga tubero ekz. de helianto kaj terpomo radika tubero ekz. de beto 1, orkido kaj fikario tubero rolas en nutriĝo kaj neseksa reproduktiĝo ➞ rizomo.
3 ANAT nomo de iaj bulformaj elstaraĵoj: parietosta tubero tuber parietale
tubera
1 rilata al tubero.
2 tuberhava: tubera rizomo tubera radiko ➞ tuberplena.
tuberaĵo
1 BOTA ŝvelaĵo, kiu aspektas kiel tubero: tuberaĵo de folioj
2 ANAT speco de tubero: tibia tuberaĵo tuberositas tibiae
tubereto
1 ANAT malgranda tubero: karotida tubereto tuberculum caroticum
2 MEDI bulforma haŭta elstaraĵo: lepra tubereto sifilisa tubereto lupusa tubereto ➞ tuberkulo; sebuma tubereto.
sebuma tubereto sebuma kisto.
tuberiĝo BOTA transformiĝo de tuto aŭ de parto de tigo aŭ radiko en tuberon: tuberiĝo de radiko
hartubero bulforma aranĝo de la haroj, plektitaj kaj kunigitaj malantaŭe de la kapo aŭ sur la nuko. ➞ vosto.
lignotubero BOTA granda ligna ronda elkreskaĵo, ĝis kelkaj centimetroj diametre, ĉirkaŭ la bazo de juna trunko; ĝi konsistas el amaso da vegetaj burĝonoj kaj vaskula histo, kaj enhavas multan nutraĵon; valora en medio, kie oftas fajro aŭ akvomanko.
multotuberulo ZOOL PALE formortinta mamulo, iom simila al ronĝulo, kies dentoj havis multajn tuberojn, kaj kiu vivis de malfrua Ĵurasio ĝis Eoceno. membro de la ordo Multituberculata (multotuberuloj) el la klaso Mammalia ➞ aloterio.